سومر, 13 جولاءِ 2020

زال ۽ مڙس جي ھڪٻئي مٿان حق حصو پھريون

  • انداز قلم

 

 

زال جا حق پيغمبر اڪرم صلى الله عليه و آله وسلم فرمايو: جيڪو پنهنجي گهروارن جي حق کي ضايع ڪري، الله سائين جي رحمت کان پري آهي. ۽ پڻ پاڻ سڳورن صلى الله عليه و آله وسلم فرمايو: اوهان ۾ سڀ کان ڀلو اهو آهي جيڪو پنهنجي گهروارن لاءِ ڀلو هجي ۽ مان پنهنجي گهروارن لاءِ اوهان سڀني کان بهتر آهيان.

زال جا مڙس مٿان حق (مڙس جون ذميداريون)

 1_ ضروريات زندگي فراهم ڪرڻ امام سجاد عليه السلام فرمايو: بازار ۾ وڃي گهروارن لاءِ هڪ درهم جو گوشت خريد ڪرڻ جنهن جي اهي چاهت رکندا ھجن، مون لاءِ هڪ غلام آزاد ڪرڻ کان وڌيڪ پسنديده آهي.

2_ نزديڪي اٺين امام عليه السلام کان سوال ڪيائون: هڪ شخص جي جوان گهرواري آهي، ان شخص تي هڪ مصيبت آئي آهي جنهن سبب ڪجھ مهينن يا شايد هڪ سال کان گهرواري سان نزديڪي نه ڪئي اٿس، البته زال کي رنج رسائڻ جي نيت نه اٿس، ڇا اهو شخص گنهگار آهي؟ امام فرمايو: جي ها، چئن مهينن کان پوءِ گنهگار آهي. حضرت ابوذر پيغمبر اڪرم صلى الله عليه و آله وسلم کان پڇيو: مڙس جي زال سان نزديڪي ۾ لذت ته آهي ئي پر ڇا گڏوگڏ ثواب به اٿس؟ پاڻ سڳورن فرمايو: جي ها، (اهو ٻڌاءِ) جيڪڏهن غير شرعي طريقي سان دل خوش ڪرين ته حرام ناهي؟ ابوذر چيو: ڇو نه، پيغمبر فرمايو: بس حلال طريقي سان ثواب آهي! مستحب آهي مرد هر چئن راتين مان هڪ رات نزديڪي لاءِ زال وٽ گزاري.

3_ زندگي جون سهوليات پيغمبر اڪرم صلي الله عليه و آله وسلم فرمايو: جيڪو بازار وڃي ٿو ۽ پنهنجي گهروارن لاءِ تحفو خريد ڪري ٿو، اهو ان شخص جيان آهي جيڪو ضرورتمندن جي گهر صدقو کڻي وڃي ٿو. اهو جنهن مهل خريد ڪيل تحفو گهر کڻي وڃي ته ان کي گهرجي ته پهريان نياڻين کي ڏئي، ان ڪري جو جيڪو پنهنجي نياڻي کي خوش ڪري اهو ائين آهي ڄڻ (حضرت) اسماعيل جي نسل مان ٻانهو آزاد ڪيو اٿس ۽ جيڪو تحفي وسيلي پنهنجي پٽ جون اکيون روشن ڪري يعني ان کي خوش ڪري، ان ڄڻ الله جي خوف ۾ ڳوڙها ڳاڙيا، ۽ جيڪو الله جي خوف ۾ رنو، الله سائين ان کي نعمتن سان ڀريل جنت ۾ داخل ڪندو. رسول اڪرم صلي الله عليه و آله وسلم ان ڳالھ کان روڪيو ته مرد جو پيٽ ڀريل هجي ۽ عورت بکايل هجي. ڇهين امام عليه السلام فرمايو: مرد کي گهر ۽ گهروارن جي پروگرام خاطر ٽن شين تي عمل ڪرڻ گهرجي چاهي اهي سندس چاهت جي خلاف هجن: سهڻو سلوڪ، اسراف کان بچندي کائڻ پيئڻ (جي شين) ۾ وسعت ۽ خانداني غيرت. چوٿين امام عليه السلام فرمايو: جيڪو پنهنجي گهر وارن کي وڌيڪ سهولتون ڏيندو، الله سائين ان کان وڌيڪ راضي هوندو. پيغمبر اڪرم صلي الله عليه و آله وسلم فرمايو: مسلمان جيڪا شيءِ الله خاطر پنهنجي گهرواري لاءِ خريد ڪري ٿو ان لاءِ صدقو ڏيڻ جو ثواب آهي.

4_ زال جو احترام: پيغمبر اڪرم صلي الله عليه و آله وسلم فرمايو: جيڪو شادي ڪري ٿو ان کي زال جو احترام ڪرڻ گهرجي. ۽ فرمايو: جيڪو زال کي ٽن مُڪن کان وڌيڪ هڻي، الله سائين قيامت ۾ پهرين ۽ پوين جي سامهون ان کي ذليل ڪندو. ۽ فرمايو: ڇا ڏينهن جو زال کي ماريو ٿا ۽ رات جو ان سان ڀاڪر پائڻ جي چاهت ٿا رکو؟! ۽ فرمايو: مون کي ان ماڻهو تي تعجب آهي جيڪو زال کي موچڙا ٿو هڻي جڏهن ته اهو پاڻ موچڙا کائڻ جو وڌيڪ حقدار آهي. زال کي سوٽي نه هڻو جو ان سان اوهان تي قصاص ثابت ٿي ويندو. رسول اڪرم صلي الله عليه و آله وسلم کان حولا پڇيو: زال جو مڙس تي ڪهڙو حق آهي؟ پاڻ سڳورن صلي الله عليه و آله وسلم فرمايو: منهنجي ڀاءُ جبرائيل عورتن جي ايتري سفارش ڪئي جو مون سوچيو ته مرد کي اهو حق نه آهي جو ان کي اُف به چوي. امير المومنين علي عليه السلام فرمايو: عورتون اوهان وٽ امانت آهن انهن تي سختي نه ڪريو ۽ انهن کي بنا ذميداري جي به نه ڇڏيو. پيغمبر اڪرم صلي الله عليه و آله وسلم فرمايو: زالن جي باري ۾ الله کان ڊڄو، اهي زندگي جا ڏک ۽ تڪليفون برداشت ڪن ٿيون الله جي حڪم، قرآن جي نص، سنت ۽ شريعت مطابق اوهان تي حلال ٿيون آهن. پنهنجو جسم لذت خاطر اوهان جي حوالي ڪرڻ ۽ اوهان جي ٻارن کي پنهنجي پيٽ ۾ رکڻ ۽ ڄم تائين خطرناڪ سور سهڻ سبب انهن جو اوهان مٿان واجب حق آهي، انهن سان مهربان هجو، انهن جي دل کي خوش رکو ته جيئن توهان سان ٺهيل هجن، انهن سان نفرت جو اظهار نه ڪريو، انهن کي جيڪو مهر ڏنو اٿؤ ان جي لالچ نه ڪريو ۽ ان مان زوري ڪا شيءِ واپس نه وٺو.

استاد حسين انصاريان جي ڪتاب اسلام جو خانداني نظام تان ورتل

 

فقهي احڪام

مهمان طور راءِ ڏيو

  • بغير راءِ جي